الدرس الأول : النبات بياكل إيه ؟
الدرس الأول: النبات بياكل إيه ؟
خلينا نبدأ من سؤال بسيط جدا :
النبات بياكل إيه ؟
طبعا إحنا عارفين إن النبات مش بياكل زي الإنسان , لكن عشان يكبر ويطلع ورق جديد ويزهر ويثمر , لازم يحصل علي مجموعة من العناصر الغذائية .
ودي ببساطة بنسميها :
العناصر الغذائية للنبات .
طيب النبات بيجيب العناصر دي منين ؟
بعضها بيجي من التربة عن طريق الجذور , وبعضها النبات بيقدر يحصل عليه من الهواء والماء .
وعشان النبات ينمو بشكل طبيعي , لازم العناصر دي تكون موجودة بالكميات المناسبة وفي الوقت المناسب .
وهنا خد بالك من كلمة مهمة :
" بالكميات المناسبة ."
لأن زيادة العنصر مش معناها إن النبات هيكبر أكتر .
والنقص طبعا مشكلة .
لكن الزيادة برضه ممكن تعمل مشكلة .
يعني ببساطة :
النبات محتاج تغذية متوازنة , مش مجرد تسميد كتير .
طيب إيه أهم العناصر اللي النبات محتاجها ؟
هنقسمهم بطريقة سهلة .
أول مجموعة : العناصر الكبرى
ودي النبات بيحتاج منها كميات أكبر نسبيا ,
وأشهرها :
نيتروجين N – فوسفورP – بوتاسيوم K
ودي أكيد سمعت عنها كتير .
لكن المهم إنك تعرف كل واحد منهم بيعمل إيه .
النيتروجين N
النيتروجين مرتبط بشكل كبير بالنمو الخضري .
يعني لما النبات يكون محتاج يبني :
- ورق
- أفرع
- نموات خضرية
النيتروجين بيكون عنصر مهم جدا .
عشان كده لما يحصل نقص شديد في النيتروجين ممكن تلاحظ إن النبات لونه بدأ يفتح والنمو بقي ضعيف .
لكن هنا لازم ناخد بالنا :
مش كل اصفرار معناه نقص نيتروجين .
ودي من أول القواعد اللي لازم نتعلمها في أكاديمية كتراج :
ما تشخصش المشكلة من عرض واحد .
لازم تبص علي النبات كله , ومكان ظهور العرض , وعمر الورقة , وطبيعة التربة والري والظروف المحيطة .
الفوسفور p
الفوسفور مهم في عمليات حيوية كثيرة داخل النبات , ومرتبط بشكل خاص بالطاقة ونمو الجذور ومراحل النمو والتكاثر .
يعني مش صح نبص له ونقول :
" ده عنصر جذور وخلاص ."
النبات أعقد من كده , إحنا عايزين نفهم وظيفة العنصر , مش نحفظ جملة ونرددها .
البوتاسيوم K
البوتاسيوم من العناصر المهمة جدا في النبات , وله أدوار متعددة مرتبطة بتنظيم الماء داخل النبات , وتنشيط عدد كبير من العمليات الحيوية , وجودة المحصول وتحمل النبات لبعض الظروف .
وعشان كده البوتاسيوم مش مجرد عنصر بنحطه وقت الثمار وخلاص .
النبات محتاجه في مراحل مختلفه من حياته , لكن الإحتياج وطريقة التعامل بتختلف حسب المحصول ومرحلة النمو .
طيب نستخدم سماد ونقول خلاص ؟
لا .
ودي أهم نقطه في الدرس كله .
التسميد مش وصفة محفوظة .
يعني مينفعش حد يقول : " حط نيتروجين ." وخلاص .
لازم نسأل :
- النبات إيه ؟
- عمره كام ؟
- في أي مرحلة نمو ؟
- الأرض حالتها إيه ؟
- الري عامل ازاي ؟
- النبات شكله عامل ازاي ؟
- هل فعلا في نقص ؟
- وهل العنصر موجود في التربة لكن النبات مش قادر يستفيد منه ؟
- كل سؤال من دول ممكن يغير التوصية .
وهنا يبدأ دور مهندس كتراج
مهندس كتراج مش شغلته إنه يحفظ أسماء الأسمده والمبيدات ويرددها .
شغلته إنه يفهم المشكلة الأول .
يشوف النبات , يسأل المزارع , يفهم الظروف , وبعدين يبدأ يفكر في الحل .
لأن :
التوصية الصح مش اسم منتج .
التوصية الصح هي فهم المشكلة واختيار الحل المناسب .
الخلاصة
لوعاوز تفتكر درس النهارده في 30 ثانية , افتكر 4 حجات :
1- النبات محتاج عناصر غذائية علشان ينمو .
2- العناصر مش كلها بنفس الوظيفة .
3- الزيادة مش دايما أحسن من النقص .
4- ما ينفعش ندي توصية قبل ما نفهم المشكلة .
وفي الدرس الجاي هنبدأ نفهم النيتروجين بشكل أعمق :
- ليه النبات محتاجه ؟
- إمتي يظهر نقصه ؟
- إزاي نفرق بين نقص النيتروجين والمشاكل اللي شبهه ؟
- وإيه الأخطاء اللي بتحصل لما نزود النيتروجين زيادة عن اللزوم ؟
أكاديمية كتراج ... نفهم الأول , وبعدين نوصي .