الدرس الثاني : أهمية النيتروجين
الدرس التاني : النيتروجين – لما النبات يحب يكبر
في الدرس اللي فات قلنا إن النبات محتاج عناصر غذائية عشان يعيش وينمو .
وهنا هنبدأ بأشهرعنصر تقريبا في عالم التسميد :
النيتروجين N
ممكن تلاقي مزارع يقولك :
" النبات مش بيكبر ... زودله نيتروجين ."
طيب هل الكلام ده صح ؟
أحيانا آه ... وأحيانا لأ .
وعشان نعرف الفرق , لازم نفهم النيتروجين الأول .
النيتروجين بيعمل إيه ؟
ببساطة , النيتروجين عنصر أساسي في بناء ونمو النبات , ومرتبط بشكل كبير بتكوين البروتينات والكلوروفيل والنمو الخضري .
يعني لما النبات يكون في مرحلة محتاج فيها يبني :
- أوراق جديدة
- أفرع
- نمو خضري
فالنيتروجين بيكون له دور مهم جدا .
وعشان كده بنقول بشكل مبسط :
النيتروجين هو عنصر مهم للنمو الخضري .
لكن خد بالك ...
ده مش معناه إن :
كل ما نزود نيتروجين = النبات يبقي أحسن .
ودي غلطة شائعة جدا .
طيب إيه اللي يحصل لو النبات ناقص نيتروجين ؟
النبات لما ما يحصلش علي احتياجه , ممكن يبدأ يظهر عليه ضعف في النمو .
ومن العلامات اللي ممكن نشوفها :
- النبات نموه ضعيف .
- الأوراق تكون أصغر أو أقل حيوية .
- يحصل اصفرار , خصوصا في الأوراق الأقدم في كثير من الحالات .
- النمو العام يكون أقل من الطبيعي .
لكن هنا لازم نقف .
هل أي نبات أصفر يبقي ناقص نيتروجين ؟
لا :
ودي نقطه مهمة جدا .
النبات الأصفر مش دايما ناقص نيتروجين
ممكن الاصفرار يحصل بسبب :
- نقص عنصر أخر
- مشكلة في الجذور
- زيادة مياه
- ضعف امتصاص
- مشكلة في التربة
- بعض الأمراض
- أو ظروف أخري .
يعني لو المزارع قالك :
" الورق أصفر , اديله نيتروجين ."
ما تستعجلش .
اسأله الأول :
أنهي ورق ؟
الاصفرار بدأ منين ؟
النبات عمره كام ؟
الري عامل إزاي ؟
الجذور حالتها إيه ؟
هل باقي النبات طبيعي ؟
هنا أنت بدأت تتصرف كمهندس , مش كبائع سماد .
طب وزيادة النيتروجين ؟
ودي مشكلة تانية .
لما نزود النيتروجين عن احتياج النبات , ممكن ندخل في نمو خضري زائد , والنبات يبقي مركز علي الورق والأفرع بشكل أكبر من المطلوب .
وفي بعض المحاصيل والظروف , زيادة النمو الخضري ممكن تسبب مشاكل في التزهير أو العقد أو جودة المحصول , وقد تزيد قابلية النبات لبعض المشكلات .
يعني ببساطة :
النبات مش محتاج نيتروجين كتير ... النبات محتاج النيتروجين المناسب .
مثال من أرض المزارع
تخيل معانا مزارع عنده محصول .
النبات نموه ضعيف .
قال :
" هاتلي سماد نيتروجيني قوي ."
هنا مهندس كتراج ما يقولش له :
" حاضر ."
يسأله :
النبات عمره كام ؟
بتروي كل قد إيه ؟
آخر تسميدة كانت إمتي ؟
الأرض رملية ولا طينية ؟
فيه مشكلة في الجذور ؟
الاصفرار موجود في الأوراق القديمة ولا الجديدة ؟
وبعدها يبدأ يشخص .
لأن ممكن المشكلة أصلا مش نقص نيتروجين .
ممكن يكون فيه مشكلة في الري أو الجذور وساعتها إضافة سماد زيادة مش هتحل أصل المشكلة .
نقطة مهمة جدا : النيتروجين مش عنصر لوحده
النبات مش بيقول : " أنا محتاج نيتروجين وخلاص ."
هو محتاج مجموعة عناصر متوازنة , يعني ممكن يكون عندك نبات واخد نيتروجين كويس جدا , لكن عنده مشكلة في عنصر آخر .
وهنا لوفضلت تزود نيتروجين , أنت مش بتحل المشكلة , انت ممكن تزود اختلال التوازن .
إزاي نفكر كمهندسين في كتراج ؟
احفظ الجملة دي :
العرض مش هو التشخيص .
اصفرار الورق = عرض .
لكن سبب الاصفرار = محتاج تشخيص
ونفس الكلام في ضعف النمو .
ونفس الكلام في احتراق حواف الأوراق .
ونفس الكلام في ضعف التزهير .
سؤال للمهندس
لو قابلت مزارع وقالك :
" النبات عندي ضعيف وورقه أصفر , اديني نيتروجين ."
هل هتوافق علي طول ؟
ولا هتبدأ تسأله وتفحص النبات الأول ؟
الإجابة الصحيحة : نفهم الأول ... وبعدين نوصي .
الخلاصة
احنا كده عرفنا إن :
1- النيتروجين عنصر أساسي لنمو النبات .
2- له دور مهم في النمو الخضري وتكوين مركبات أساسية داخل النبات .
3- نقصه ممكن يظهر في صورة ضعف نمو واصفرار , لكن الاصفرار مش دليل كافي لوحده علي نقص النيتروجين .
4- زيادة النيتروجين ممكن تعمل مشاكل , ومش معناها ان النبات هيبقي أفضل .
5- التوصية الزراعية تبدأ بالتشخيص , مش باسم السماد .
وفي الدرس الجاي هنكمل مع النيتروجين , لكن من زاوية عملية جدا :
النيتروجين دخل النبات ازاي ؟
وإيه الفرق بين صور النيتروجين المختلفة ؟
وليه مصدر النيتروجين وطريقة استخدامه ممكن يفرقو جدا في النتيجة ؟
اكاديمية كتراج ... نفهم الأول , وبعدين نوصي .