الدرس الثامن : حركة البوتاسيوم وتشخيص أعراض النقص
حركة البوتاسيوم وتشخيص أعراض النقص
بعد ما عرفنا إن البوتاسيوم له دور مهم في تنظيم المياه والثغور وتنشيط كثير من العمليات الحيوية ودعم جودة المحصول، هنحتاج نعرف حاجة مهمة جدًا:
البوتاسيوم بيتحرك جوه النبات إزاي؟
ولو في نقص بوتاسيوم، الأعراض هتظهر فين؟
أولًا: البوتاسيوم عنصر متحرك .
البوتاسيوم من العناصر المتحركة داخل النبات.
يعني لما النبات يكون عنده نقص، يقدر يعيد توزيع جزء من البوتاسيوم الموجود في الأنسجة القديمة ويوجهه للأجزاء الأحدث والأكثر احتياجًا.
وعشان كده أعراض النقص غالبًا تبدأ في الأوراق الأكبر سنًا.
ثانيًا: أعراض نقص البوتاسيوم تظهر فين؟
بما إن البوتاسيوم متحرك:
أعراض النقص غالبًا تظهر أولًا على الأوراق القديمة، خصوصًا الأوراق السفلية.
ومن أشهر العلامات:
- اصفرار يبدأ من حواف الأوراق.
- احتراق أو جفاف حواف الورقة مع تطور النقص.
- ظهور الأعراض بين العروق في بعض الحالات.
- ضعف عام في النبات.
- وقد يتأثر حجم وجودة المحصول.
لكن شكل الأعراض ممكن يختلف حسب المحصول وشدة النقص.
طيب ليه الحواف بتتأثر؟
دي من العلامات اللي بنشوفها كثيرًا مع نقص البوتاسيوم.
ومع تطور النقص، ممكن يبدأ لون حواف الورقة يتغير من الأخضر إلى الأصفر، وبعدها تظهر مناطق بنية أو جافة تشبه الاحتراق.
وده أحيانًا بيتوصف بـ:
احتراق حواف الأوراق – Leaf scorch
لكن برضه:
مش كل احتراق في حواف الورقة معناه نقص بوتاسيوم.
ممكن نشوف أعراض مشابهة بسبب:
- الملوحة.
- إجهاد مائي.
- مشاكل في الجذور.
- بعض الأضرار أو الظروف الأخرى.
وعشان كده لازم نشوف الصورة كاملة.
ليه الأعراض تظهر على الأوراق القديمة؟
لأن البوتاسيوم عنصر متحرك داخل النبات.
لما يكون فيه نقص، النبات يقدر ينقل جزء من البوتاسيوم من الأوراق القديمة إلى الأجزاء الحديثه.
فتبدأ الأوراق القديمة تظهر عليها علامات النقص.
يعني:
البوتاسيوم متحرك → النبات يعيد توزيعه → الأعراض تظهر غالبًا على الأوراق القديمة.
مفتاح التشخيص — البوتاسيوم
حركة العنصر:
متحرك داخل النبات.
أعراض النقص تظهر غالبًا في:
الأوراق القديمة والسفلية.
أشهر العلامات:
- اصفرار حواف الأوراق.
- احتراق أو جفاف الحواف مع شدة النقص.
- ضعف النمو.
- وفي بعض المحاصيل قد تتأثر جودة وحجم المحصول.
سؤال مهم للمهندس:
لو المزارع قال:
"الورق عندي بيتحرق من الأطراف."
ما تقولش فورًا:
"ده نقص بوتاسيوم."
اسأله:
الحرق بدأ في الأوراق القديمة ولا الجديدة؟
الورقة كلها شكلها إيه؟
فيه ملوحة؟
الري منتظم؟
الجذور حالتها إيه؟
لأن نفس العرض ممكن يكون له أكثر من سبب .
مثال عملي
تخيل إن عندك نبات.
الأوراق القديمة بدأت يظهر على حوافها اصفرار , وبعد فترة بدأت الحواف تتحول لبني وتجف , بينما النموات الجديدة أقل تأثرا .
هنا :
نقص البوتاسيوم احتمال وارد .
لكن قبل التوصية لازم نراجع :
- المحصول .
- عمر النبات .
- مرحلة النمو .
- نظام الري .
- ملوحة التربة أو مياه الري .
- حالة الجذور .
- برنامج التسميد .
- وهل هناك عناصر أخرى مختلة ؟
وبعدها نحدد السبب الأقرب .
نقطة مهمة جدا
زي ما قلنا في الفوسفور :
لازم نفرق بين حركة العنصر داخل النبات وحركته في التربة .
إحنا هنا بنقول :
البوتاسيوم متحرك داخل النبات .
لكن سلوك البوتاسيوم في التربة مختلف حسب نوع التربة , خصوصا حسب محتوى الطين ونوع المعادن الموجودة فيها .
وعشان كده إدارة التسميد لازم تتناسب مع طبيعة الأرض ونظام الري .
خلاصة البوتاسيوم
البوتاسيوم : متحرك داخل النبات
النقص : يظهر غالبا علي الأوراق القديمة .
أشهر الأعراض : اصفرار حواف الأوراق ثم احتراقها وجفافها مع تطور النقص .
لكن : الملوحة والإجهاد المائي ومشاكل الجذور وغيرها ممكن تعمل أعراضا مشابهة .
الحرق على حافة الورقة علامة مهمة ... لكنه مش حكم نهائي .
أكاديمية كتراج ... نفهم الأول , وبعدين نوصي .