الدرس التاسع : الكالسيوم
الكالسيوم – بناء النبات من جوه
بعد ما اتكلمنا عن :
النيتروجين – الفوسفور – البوتاسيوم
ندخل على مجموعة تانية اسمها :
العناصر الثانوية
وأول عنصر فيها :
الكالسيوم Ca
طيب الكالسيوم بيعمل إيه في النبات ؟
لو عايزين نقولها بطريقة بسيطة :
الكالسيوم مهم في بناء وتقوية أنسجة النبات , وله دور أساسي في سلامة جدر الخلايا .
يعني تخيل إن خلايا النبات ليها " بناء " , والكالسيوم واحد من العناصر المهمة في تماسك هذا البناء .
طيب الكالسيوم موجود فين ؟
الكالسيوم موجود في أجزاء مختلفة من النبات , لكن من أهم النقاط اللي لازم نفهمها :
الكالسيوم حركته داخل النبات محدودة نسبيا , وبيتحرك مع تيار المياه في الخشب بشكل أساسي .
وده معناه إن النبات محتاج إمداد مستمر ومناسب منه , خصوصا للأنسجة اللي بتنمو .
وعشان كده مشاكل الكالسيوم ممكن تظهر بشكل واضح في :
النموات الجديدة .
طب ليه النموات الجديدة ؟
لأن الكالسيوم مش سهل ينتقل من الأوراق القديمة إلي النموات الجديدة .
يعني لو النبات عنده كالسيوم في ورقة قديمة , مش معناه إن النبات يقدر بسهولة يسحب الكالسيوم منها ويروح يودية للورقة الجديدة .
وعشان كده :
مكان ظهور العرض بيفرق جدا في التشخيص .
ودي قاعدة مهمة جدا لمهندس كتراج .
الكالسيوم وعلاقته بالثمار
وهنا نبدأ نفهم ليه الكالسيوم مهم جدا في بعض محاصيل الفاكهة والخضر .
الكالسيوم يدخل في بناء جدر الخلايا , وبالتالي له علاقة بسلامة وتماسك الأنسجة .
وعشان كده نقص الكالسيوم ممكن يرتبط ببعض المشاكل الفسيولوجية في الثمار والأنسجة النامية .
ومن الأمثلة المعروفة في بعض المحاصيل :
عفن الطرف الزهري في الطماطم والفلفل .
لكن خد بالك من نقطة مهمة جدا :
ظهور عفن الطرف الزهري مش معناه تلقائيا إن التربة ناقصة كالسيوم .
ممكن يكون الكالسيوم موجود ...
لكن وصوله للثمرة أو الأنسجة النامية غير كاف بسبب مشاكل في حركة المياه أو ظروف أخرى .
يعني إيه ؟
خلينا ناخد مثال .
عندك مزرعة طماطم .
المزارع شاف عفن في نهاية بعض الثمار وقال :
" دي مشكلة كالسيوم , هات كالسيوم ."
هنا مهندس كتراج ما يستعجلش .
يسأل :
الري منتظم ؟
النبات بيتعرض لعطش وبعده ري غزير ؟
الجذور حالتها إيه ؟
فيه ملوحة ؟
الرطوبة منتظمة ؟
لأن وصول الكالسيوم للأنسجة مش مجرد موضوع :
" أضفت كالسيوم = المشكلة انتهت ."
الكالسيوم والري أصحاب جدا
الكالسيوم بيتحرك داخل النبات مع المياه .
فلو حركة المياه داخل النبات فيها مشكلة , وصول الكالسيوم للأنسجة الجديدة ممكن يتأاثر .
يعني إدارة الري مش مجرد : النبات عطشان أو مش عطشان .
الري جزء من إدارة التغذية نفسها .
طيب هل نزود الكالسيوم وخلاص ؟
لأ.
لأن حتى العناصر الغذائية بتتداخل مع بعضها .
وزيادة بعض العناصر ممكن تؤثر علي امتصاص أو توازن عناصر أخرى .
عشان كده إحنا في أكاديمية كتراج مش هنقول :
" العنصر ده مهم , يبقى زوده ."
هنقول :
العنصر ده مهم , لكن النبات محتاج منه قد إيه ؟ , وهل المشكلة أصلا نقصه ؟"
مثال بسيط
تخيل مزارع بيقولك :
" النموات الجديدة ضعيفة ومش طبيعية , اديني كالسيوم ."
بدل ما ترد عليه باسم منتج , اسأل :
- النموات الجديدة شكلها إيه ؟
- الأوراق القديمة طبيعية ؟
- الجذور سليمة ؟
- الري منتظم ؟
- التربة حالتها إيه ؟
- في أعراض أخرى ؟
- هل المشكلة فعلا مرتبطة بالكالسيوم ؟
وبعد كده تبدأ التوصية .
معلومة مهمة جدا
الكالسيوم مش عنصر بنحطه للنبات عشان " يقويه " وخلاص .
دي كلمة عامة جدا .
إحنا عايزين نفهم هو بيقوي إيه ؟ وإزاي ؟
الكالسيوم له دور في :
جدر الخلايا
تماسك الأنسجة
سلامة الأغشية الخلوية
النمو الطبيعي للأنسجة الجديدة
وده اللي يخلي أهميته كبيرة في مراحل نمو مختلفة .
والسؤال
لو شفت مشكلة في ثمرة , هل أول حاجة تقول :
" أكيد نقص كالسيوم "؟
لا.
تقول :
" خلينا نفهم السبب الأول ."
لأن :
وجود عرض مرتبط بعنصر لا يعني بالضرورة أن المشكلة سببها نقص هذا العنصر في التربة .
الخلاصة
1- الكالسيوم عنصر مهم في بناء وسلامة أنسجة النبات .
2- الكالسيوم له دور مهم في جدر الخلايا والأغشية الخلوية .
3- حركته داخل النبات محدوده نسبيا , ويعتمد وصوله للأنسجة علي حركة المياه .
4- لذلك تظهر مشكلات نقصه كثيرا في الأنسجة والنموات الجديدة .
5- بعض مشاكل الثمار قد ترتبط بعدم كفائة وصول الكالسيوم , لكن السبب مش دايما نقص الكالسيوم في التربة .
6- انتظام الري وصحة الجذور جزء أساسي من امتصاص وحركة الكالسيوم .
( مش المهم إن الكالسيوم موجود...المهم إنه يوصل للمكان اللي النبات محتاجه )